Ljubljanski škof Sigmund /Lamberger/ prosi sodnika, svet in občino v Ljubljani naj po smrti kaplana zgodnjika Nikolaja podele to kaplanijo tistemu, ki ga bo on predlagal.

Prepis v nedatiranem vidimusu iz ok. 1500 v MALj. /SI ZAL LJU 333-56/

Sigmundt vonn gots gennaden bischoffe zw Laibach. Erbern weisen besunder lieben vnnsern freundtlichen gruess in beweisung williger diennst beuor. Wir haben vernomen wie herr Niclas caplan der fruemess zw Laibach eurer lehennschafft yez laider mit schwerer khrannkhait beladen sey der er villeicht hart in leben peleiben mag. Bitten wir ew in sunderm vleiss vnd getrawn ob es darzue khame das dieselb fruemess also mit seinem todt ledig wurde ir wollet alssdann dieselb capelln vnns zu geuallen ainem der vnnsern den wir ew dann darzw nennen vnnd furhalten werdenn vor menigclich leihen vnnd niemand andern noch khainen darauff verrer vertrosten vnnd vor an durch vnnser bischofflichen erstn bete willen damit wir ew hiemit ansuehen thun besunder auch nachdem wir ew vor mit pete von solcher gotsgab wegen nie angelanngt haben. Vnnd hoffen ir werdet ew darine solchermass bewisen damit wir sunderlich darinne anngesehen vnnd der nicht verzigen werdenn alls wir dann des vnzweyuentlich sunder vertrawen zw ew habenn wann so sich zu zeitten solchs immer in vnnser gwalltsam begeben wurde, sein wir ew willig daentgegen nach allten pillichen zw gleicher weiss auch geualln in ainem solchen vnd merern zu beweisen wenn wir darumb durch ew angesuecht werden das auch freundtlich in annder weeg vmb ew verdienn. Geben zw Crainburg am sambstag nach vnser lieben frawen tag conceptionis, anno domini etc. LX^mo tercia. Den erbern weisen vnsern besunder lieben n.dem richter ratte vnnd der gemaine zw Laibach.

GZL III/74

Po prepisu B. Otorepec