Cesar Friderik III. naroča Andreju Hohenwarterju, glavarju v Metliki naj ne sodi ljubljanskih meščanov pred deželnim ograjnim sodiščem v Metliki, ker so se zaradi tega pritožili. Njih sodi le ljubljanski mestni sodnik.

Prepis iz 16. stol. v privil. knjigi Ljubljane v MALj, fol. 12′-13. /SI ZAL LJU 488, COD XXV/
Obj.: Klun, Dipl. Carn., str. 40, št. 52.

Wir Friderich von gottes gnaden romischer kaiser zu allen zeiten merer des reichs zu Hungern, Dalmacien, Croacien etc. kunig herzog zu Osterreich, zu Steyer, zu Kerndten vnnd zu Krain etc. Embieten vnnserm getrewen lieben Anndreen Hohennwarter vnnserm haubtman in der Möttling oder seinem verweser daselbs oder wer kunfftigclich vnnser haubtman oder verweser daselbs in der Mettling werden vnnser gnad vnnd alles gut. Die erbarn weisen vnnser getrewen lieben n.der richter, rat vnnd vnnser burger gemainclich ze Laybach haben vnns anpringen lassen, wie sie wider ire freyhait vnnd priuilegi in von vnns vnnd vnnsern voruordern gegeben vor dein in vnnser landtschrann daselbs in der Mettling beklagt vnnd mit recht furgenomen werden, des sie sich beswert vnnd vnns vnpillich bedunckht. Emphelchen wir dir ernstlich vnnd wellen, ob die bemelten vnnser richter, rat vnnd burger samentlich oder in sonderhait von yemannd, wer der wer, vor dein in der berurten vnser landtschrann, vmb was sachen das wer, bisher icht beklaget oder mit recht furgenomen wern oder hinfur icht beklagt oder furgenomen wurden, das du darin dhain verhörung nicht tust noch sich recht darumb vor dein ergeen lassest, sonnder die fur vnnsern richter daselbs zu Laybach, wer der ye zu zeiten sein wirdet, schiebest vnnd weisest, damit die egemelten vnnser burger bey den obberurten iren freyhaiten vnnd priuilegien gehalten vnnd dawider nicht gedrungen werden. Daran tust du vnnser ernstliche mainnung. Geben zu der Newnstat an mittichen nach dem sontag reminiscere in der vasten, anno domini etc. im funfvnndsechzigisten, vnnsers kaiserthumbs im dreyzehennden jar.

GZL III/76

Po privilegijski knjigi B. Otorepec

© 2016 Zgodovinski arhiv Ljubljana. Vse pravice pridržane.

Prilagoditev pisave