Cesar Maksimilijan I. dovoli mestu Ljubljani za vsoto denarja izgnati vse žide iz mesta.

Prepis iz 16. stol. v privil. knjigi Ljubljane v MALj, fol. 56′-57′, št. 85.
Obj.: Klun, Dipl. Carn., str. 65, št. 95.

Wir Maximilian von gottes gnaden erwelter römischer kaiser zu allen zeitten merer des reichs in Germanien zu Hungern Dalmacien Croatien etc. kunig erzhörzog zu Osterreich hörzog zu Burgundi zu Brabant vnnd pfalzgraue etc. Bekennen für vns vnd vnser erben vnnd nachkomen offentlich mit disem brief vnnd thun kundt allermenigclich das vns die erbern weisen vnnser getreuen lieben n.burgermaister richter vnd räthe vnser stat zu Laibach anbracht wie aus vnserm vergonnen ain zeitlanng etwouill juden bey inen gewendt, iren wucher getriben aber aus derselben irer handlung vnnd wucherey vnser burger vnnd inwoner daselbst zu Laibach in merklich verderben khumen vnnd wo durch vnns darein nit gesehen werde, sey zu besorgern /!/ dieselb vnnser stat Laibach möchte dardurch noch in grösser verderben vnnd nachtaill kumen, vnnd vns darauf vndertheingclichen anruefen vnnd bitten lassen sie derselben juden zu endledigen auch sie vnnd gemaine stat Laibach mit fraihait zu uersehen damit sie vnnd ir nachkomen weitter nit schuldig sein ainich juden mer in ewig zeit bey inen einkomen noch da wonen zu lassen, vnnd so wir dann derselben vnnser vndterthonnen vnd burger verderben zu uerhuetten genaigt sein, haben wir darumb auch gegen ainer suma gelts so sie vns bezalt, gnedigclichen bewilligt die gedachten juden daselbs zu Laibach austreiben zu lassen, geben inen auch als erzherzog zu Österreich von sondern gnaden wegen dise freyhait vnnd tun daz wissentlich mit dem brief also das die gemelten burgermaister richter vnnd rätte zu Laibach vnnd ir nachkomen in ewig zeit weitter nicht gepunden schuldig vnnd verphlicht sein sollen kainen juden mer mit heuslicher wonung bey inen in der berurten vnser stat Laibach einkomen noch da wonen zu lassen vnnd gebietten darauf vnnsern gegenwurttigen vnd yeden vnsern zukunfftigen haubtleütten verwesern vnnd vizdomben in Crain ernstlich mit disem brief vnnd wellen daz sie die obgenanten burgermaister richter vnnd rathe ze Laibach vnnd ir nachkomen bey der obbestimbten vnnser gnad vnnd freihait von vnnsern wegen vestigclichen handthaben vnd darwider kainen juden in ewig zeit mit hewslicher wonung daselbst zu Laibach nicht mer einkomen noch da lassen, das mainen wir ernstlich. Mit vrkhundt des briefs geben in vnnser statt Insprug den ersten tag des monats januarii anno domini etc. funfzehenhundert vnnd im funffezehenndten vnnserer reiche des römischen im neunundzwinzigisten vnnd des hungerischen ihm funfvnndzwainzigisten.

GZL IV/67

Po privilegijski knjigi B. Otorepec

Publikacije