Lovre Černiverh, Primož Golober in Primož Kolman cehovski mojstri bratovščine sv. Jakoba na Starem trgu potrjujejo, da je meščan Gašper z ženo Marjeto zapustil bratovščini njivo za večno mašo.

Vidimus v list. 1467, februar 6. sl. v MALj.

Ich Laure Tscherniuerch ich Primos Golober vnd ich Primos Kolman all drey burger zw Laibach vnd dye zeitt zechmaister des heiligen heren sannd Jacobs des zwelliffpotten vnsers herren bruderschafft der cappellen am Altenmarkt ze Laibach bekennen fur vns vnd all vnser nachkomenden czechmaistern vnd brüder derselben bruderschafft das der erber Kaspar burger zw Laibach heren Pauls weilend capplan im spittall ze Laibach seligen bruder vnd Margreth sein eleiche hawsfraw vns vnsern nachkomenden czechmaistern vnd vnsern obgenanten bruderschafft geben gestifft vnd gemacht haben irs ledigs vnd aigens kauffguts ain akcher mitt aller seiner zugehorung vor der statt Laibach vnder dem vorst zwischen der strassen als man an dye Polangett vnd des Clemendt Kaltenstuben akchern gelegen der jarleich an abgangk ain gulden zynns trait vnd bringet. Also vnd in der mass das wir gelobt vnd versprochen haben, loben vnd versprechen auch fur vns vnd fur all vnser nachkomenden zechmaistern vnd bruder der benanten bruderschafft wissentleich mit dem brieff, das wir vnd vnser nachkomenden zechmaister vnd bruder ewigkleich an abganngk albeg vnd alle jar järleich irselbs vnd heren Pauls des genanten Kaspars bruoders, heren Jacobs seins öhems vnd czwen heren Iacoben seiner vettern der briester, Crise vnd Anna seins vatters vnd muotters, Petters vnd Gedrawten seins ens vnd ans, Balthers seins vrens, Angnes vnd Anna seiner tochteren, Margaretten seiner eneklin, Mathes kursner seins aidems vnd allen iren varuoderen vnd nachkomen elteren vnd jungeren seellen zw haill ein ewigs jarstag in der genanten cappellen sannd Jacobs zwischen sannd Michels vnd aller heiligen tag welleichs tags das sey mit funff briesteren vnd selmessen getreuleich vnd vngeuerleich begeen sullen vnd wellen vnd das süllen wir tun mit iren oder irs erbs eines wissen vnd von dem obgenanten zynns des akchers sullen wir vnd vnser nachkomen zechmaister den vyer briestren yegleichem zehen schiling geben vnd dem yeczigen capplan der oberurten cappellen vnd seinen nachkomen vyerczigk schilling dye sullen nuo ein offene peicht sprechen vnd zw einer ewigen gedechtnuss bey namb vmb dye obgenanten vnd in der gemayn vmb all ir varuader vnd nachkomen elter vnd jünger seellen bitten, auch in den messen sullen dye briester ein yeder dye obgenanten seell bey namb in der gedechtnuss der taden haben vnd vmb sew bitten vnd dye benanten seel sullen dye capplen den briesteren nemleich verschriben geben. Auch sol der yecziger capplan vnd all sein nachkomen capplen der genanten cappellen ewigklich an abgannkg alle suntag nemleich vmb die egenanten vnd in der gemayn vmb all ir elter vnd jünger seellen bitten so er vmb ander seel auff dem lekchter bitt zw einer ewigen gedechtnuss. Den anderen taill awer des czynns des genanten akchers sullen wir vnser nachkomen zechmaister vnd bruder zw dem lyecht vnd andere natdurfft der egenanten cappellen anlegen vnd geben vnd ob wir vnd vnser nachkomen zechmaister vnd brüder solich ewigs jarstag vnd begeen mit funf seelmessen vnd gedechtnuss der genanten seel genczlich vnd volkomenleich alle jar jarleich vnd ewigklich an abganngk zw der obgenanten zeytt nicht begyengen oder nicht begeen vnd volbringen wolten als oben geschriben stet, so sol vnd mag der yecz capplan vnd sein nachkomen capplen vns vnser nachkomen zechmaister vnd bruder mit dem brieff ermannen, das wir dem nach komen vnd das volbringen nach laut des brieffs. Tetten wir oder vnser nachkomen dann des nicht oder nicht tuon wolten, so weren wir oder vnser nachkomenden czechmaister vnd brüder dem yecz capplan oder sein nachkomenden capplen der genanten cappellen die den brieff inne habent denn obgenanten czynns von dem egenanten akcher vnder dem varst als oben bemelt ist gelegen ganncz vnd gar an alle gnad veruallen vnd sullen vnd mügen sy sich desselben zynns gar vnderwinden vnd innemen an vns vnser nachkomenden zechmaister vnd der bruder irrung vnd widersprechen mit vnser aller gunst vnd gutten willen, welleichs jars vnd als offt wir oder vnser nachkomen das vberfuren vnd nich stet hyelten vnd volbrechten oder nicht volbringen wolten als oben geschriben stett vnd dann dyeselben capplen der genanten cappellen sullen dauon das alles tuon, begeen vnd volbringen als oben bemelt ist. Wer awer auch das der yecz capplan oder sein nachkomen capplen den genanten jarstag vnd dye funf selmess also jarleich nicht begyengen oder nicht begeen vnd volbringen wolten vnd vmb dye vorgenanten seel nemleich nicht petten als oben bestimbt ist, so solten vnd mochten wir oder vnser nachkomen zechmaister vnd bruder den obgenanten zynns von den oberurten akcher gancz vnd gar woll innemen, haben vnd behalden als lanngk das das genczlich volbracht vnd begangen wurd als oben geschriben ist vnd ob es awer wer das der yecz capplan vnd sein nachkomen capplen also vnwillig vnd sawmig wern vnd widerred hyetten das sy des mit nichte tuonbegeen vnd volbringen wolten, so sullen vnd mügen wir wol oder vnser nachkomen zechmaister vnd brüder den obgenanten zynns an des yczigen capplans vnd seins nachkomen capplans willen vnd irrung daselbst zw sannd Jacab oder anderswo, wo vns das lieb wer an dy funf seelmess anlegen vnd dye begeen vnd alles das genczikleich volbringen als oben geschriben stett, damit der allmechtig got dauon geert vnd gelobt vnd dye stifftung vnd vermachen volbracht wurd als oben berürt ist vnd das alles was an dem brieff geschriben stett ist geschehen vnd gehandelt mit des ersamen herren Hannsen Glukch dye zeitt capplan der obengenanten sannd Jacabs cappellen am Altenmarkt ze Laibach gunst, wissen vnd gütlichen willen an all sein irrung vnd widersprechen. Vnd das es also als oben geschriben stet vnd auch der stifftbrieff vns von dem obgenanten Kaspar vnd Margaretten seiner hausfrawen darüber gegeben bey krefften beleib vnd gennczlich volfürt werde des ze urkund geben wir inn vnd den capplen der obemelten sannd Jacabs cappelln fur vns vnd fur all vnser nachkomenden czechmaister vnd bruder der benanten bruderschafft dem brief besigelten mit der fursichtigen erberen vnd weisen Petter goldsmid yeczzeitten stattrichter zw Laibach vnd Melchior Poschen geswaren des rats daselbs baider anhangunden insigelen dye sy durch vnser obgemelten Laure Tscherniuerch, Primos Golober vnd Primos Kcholman vleyssiger pett willen an den brieff gehangen habent dach in vnd irem erben an schaden, darunder wir vns obgenanten Laure vnd bed Primos für vns vnd für all vnser nachkomenden zechmaister vnd bruder der genanten bruderschafft verbinden alles das war vnd stett ze halden vnd ze uolfüren das oben an dem brieff geschriben stet. Der geben ist nach Kristi geburd vyerczehenhundert jar vnd darnach in dem sachsvndsechtzikgisten jare an sannd Andreas tag des heyligen zwelliffpotten.

GZL III/77

Po vidimusu B. Otorepec

Ljubljana
Čitalnica
ponedeljek, torek, četrtek in petek: 8.00–14.00
sreda: 8.00–16.00
Zgodovinski arhiv Ljubljana
Enota v Ljubljani
Trdinova ulica 4, p. p. 1614
1001 Ljubljana
Sprejemna pisarna
ponedeljek: 8.00–14.00
sreda: 8.00–16.00
petek: 8.00–12.00
Čitalnica:
T: +386 (0)1 306 13 20Sprejemna pisarna:
T:+386 (0)1 306 13 17
+386 (0)1 306 13 03
F: +386 (0)1 426 43 03
E: sprejemna@zal-lj.si
Kranj
Čitalnica
ponedeljek, sreda: 8.00–14.00
torek, petek: 8.00–12.00
Zgodovinski arhiv Ljubljana
Enota za Gorenjsko Kranj
Savska cesta 8
4000 Kranj
Sprejemna pisarna
ponedeljek, sreda: 8.00–14.00
petek: 8.00–12.00
T: +386 (0)4 280 59 00
F: +386 (0)4 202 44 48
E: zal.kra@zal-lj.si
Novo mesto
Čitalnica
ponedeljek, sreda: 8.00–14.00
torek,petek: 8.00–12.00
Zgodovinski arhiv Ljubljana
Enota za Dolenjsko in Belo krajino Novo mesto
Skalickega ulica 1 (grad Grm)
8000 Novo mesto
Sprejemna pisarna
ponedeljek, sreda: 8.00–14.00
petek: 8.00–12.00
T: +386 (0)7 394 22 40
F: +386 (0)7 394 22 48
E: zal.nme@zal-lj.si
Škofja Loka
Čitalnica in sprejemna pisarna
ponedeljek, sreda, četrtek: 8.00-13.00
Zgodovinski arhiv Ljubljana
Enota v Škofji Loki
Partizanska cesta 1c
4220 Škofja Loka
   T: +386 (0)4 506 07 00
F: +386 (0)4 506 07 08
E: zal.skl@zal-lj.si
Idrija
Čitalnica in sprejemna pisarna
ponedeljek, sreda, četrtek: 8.00-13.00
Zgodovinski arhiv Ljubljana
Enota v Idriji
Prelovčeva ulica 2
5280 Idrija
  T: +386 (0)5 372 22 70
F: +386 (0)5 372 22 71
E: zal.idr@zal-lj.si

© 2016 Zgodovinski arhiv Ljubljana. Vse pravice pridržane.

Prilagoditev pisave