Kralj Maksimilijan I. dovoli na prošnjo sodnika in sveta, da Ljubljana voli odslej vsako leto župana.

Prepis iz 16. stol. v privil. knjigi Ljubljane v MALj, fol. 15-16, št. 29.
Obj.: MHVK IX/1854/, str. 14-15; Klun, Dipl. Carn., str. 55, št. 83.

Wir Maximilian von gottes gnaden romischer kunig zu allen zeitten merer des reichs zu Hungern Dalmacien Croacien etc. kunig erzherzog zu Osterreich herzog zu Burgundi zu Brabandt vnd pfalzgraue etc. Bekennen das vns vnnser getrew lieb richter vnnd rath zu Laybach furbringen haben lassen wie bisher bey inen in der stat Laybach kain burgermaister gewesen dardurch dann menig versaumnus vnrat vnnd schaden gemainer stat entstannden vnnd teglich zu besorgen erwachsen mecht vnnd vns diemuetigclich angerueffen vnd bitten das wir solchs zu furkomen vnd inen ainen burgermaister zu welen vnd zukiesen zu uergonnen vnd zu erlauben gnedigclich geruchten. Solch ir diemuetig zimblich bet auch die getrewen vnnd nuzlichen dienste so sie vnnd ir vordern vns vnd vnnserm haus Osterreich bisher gethan vnnd erzaigt vnnd damit die gemelt stat in ordenlich wesen vnnd aufneunng gebracht werde, haben wir angesehen vnnd darumb mit wolbedachtem muet gutem rat vnnd rechter wissen den obgenanten richter vnnd rath zu Laybach gegent vnd erlaubt, gonen vnnd erlauben inen auch von romischer kunigclicher vnnd furstlicher macht wissentlich in crafft diz brieffs das sie nun hinfur ewigclich aines jeden jars ainen burgermaister vnder inen selbs der ain geschickte taugenliche person auch erbars wesen sey, welen vnnd kiesen mugen, doch so sol es mit solcher welung vnd erkiesung auch mit der aidts pflicht so derselb burgermaister zu thuen schuldig ist, wie in anndern vnnsern stetten vnnsers furstenthumbs Steyer beschicht gehalten werden. Es /popravljeno v: Er/ soll auch vnns vnnd der vorgemelten stat ere nuz vnnd frumen betrachten vnnd alles das thun das ainem burgermaister gepurt vnnd zusteet alles von recht oder gewonnhait von aller menigclich vnuerhindert. Vnnd gebieten darauf allen vnnd yegclichen fursten geistlichen vnnd weltlichen prelaten grauen freyen herrn rittern knechten haubtleuten vizdomben pflegern verwesern burgermaistern richtern retten burgern gemainden vnnd sunst allen anndern vnnsern ambtleuten vnderthonen vnnd getrewen in was wirden stants oder wesens die sein ernstlich mit disem brief vnnd wellen das sie die genanten richter vnnd rathe zu Laibach an solchem vnnserm vergönnen vnnd erlauben nicht hindern noch irren vnnd des yemands annderm zu tun gestatten in dhain weise sonnder sie dabei berueblich beleiben vnd hanndlen lassen inmassen annder burgermaister in vnnsern stetten in Steyer zw hanndlen haben bey vermeidung vnnser vngnad vnd straf vnnd darzu ainer peen nemblich zehen markh löttigs golds die ain yeder so offt er frauentlich hie wider tete vnns halb in vnnser camer vnnd den anndern halben tail den obbestimbten burgermaister richter vnnd rate zu Laybach vnableslich zu bezallen verfallen sein soll. Das mainen wir ernstlich. Mit vrkundt der briefs besigelt mit vnnserm kunigclichen anhangenden insigl. Geben zu Augspurg am neunvnzwainzigisten tag des monats february nach Christi geburde funfzehenhundert vnnd im vierten vnnserer reiche des römischen im neunzehenden vnnd des hungerischen im funfzehenden jare.

GZL IV/44

Po privilegijski knjigi B. Otorepec