Cesar Maksimilijan I. izdaja odredbo proti tujim kramarjem in trgovskim družbam.

Orig. papir v MALj.

Wir Maximilian erwelter von gotts gnaden romischer kayser zu allenn tzeiten merer des reichs in Germanien zu Hunngern Dalmacien Croacien etc. kunig ertzhertzog zu Osterreich hertzog zu Burgunndi zu Brabannd vnd phalentzgraue etc. Embieten den edeln vnnsern lieben getrewen allen vnnsern hawbtlewten lanndmarschalchen grauen freyen herrn rittern vnd knechten verwesern vitztumben phlegern burggrafen lanndtrichtern burgermaistern richtern reten burgern gemainden vnnd sunnst allen anndern vnnsern ambtlewten vnnderthanen vnnd getrewen so diser vnnser brief furkumbt oder verkunndt wirdet vnnser gnad vnd alles gut. Wir werden bericht wie etwouil auslenndig cramer vnd hawsierer als Schotten vnd dergleichen lewt allennthalben in vnnsern erblichen furstentumben vnd lannden vmb ziehen vnnd mit iren phenwarten gewurtz vnnd anndern kawfmansgutern, die doch zum merern tail vngerecht vnnd nicht gutwerig sein, vasst alle slosser mergkht dorffer wirtshewser vnnd flegkhen besuchen, sich auch etlich Hunngern Walhen vnd oberlenndisch gesellschefften in dorffern vnnd flegkhen gedachter vnnser erblichen furstntumben auf kastraun ochsen vnnd annders gross suma gellts zu furkauff vnndersteen sullen zu legen darzu in dann durch etlich aus ew so megkht vnnd dorffer haben hilff vnd furdrung gethan werde, das vnnsern steten vnd mergkhten bemelter vnnser erblichen furstentumben vnd lannde, nachdem dardurch der hanndel damit sy sich betragen solten gar von inen kumbt, zu mergklichen schaden nachtail vnd verderben raichet, vnnd vns dieweil die sachen wo darynn nicht wenndung oder fursehung durch vns beschehe nicht allain vnnsern burgern bemelter vnnser stett, sonnder auch vns vnd vnnsern erben in vnnserm camergut kunftigclich zu schaden kumen mocht, zu gedulden kains weegs gemaint ist. Vnnd emphelhen demnach ew allen vnd ewr yedem ernnstlich gebietend vnd wellen, das ir nu hinfuro in vnd bey vnnsern herrschefften slossern merckhten dorffern flegkhen vnd gebieten allenthalben in ewren verwesungen kainen auslenndigen cramer hawsierer Schotten vnd dergleichen lewte so mit vnnsern lanndtschefften vorbestimbter vnnser erblichen furstentumben vnnd lannde nicht mitleiden tragen ainicherlay hanndtirung wie vor begriffen ist treiben, sonnder die vorgemelten vnnser burger ynn stetten vnd mergkhten bey solher hanndtirung vnd gewerb inmassen wie vor allter herkumen ist von vnnsern wegen vesstigclichen hanndthabet vnd sy derselben gebrauchen vnd geniessen lasset vnnd nicht gestattet sy von ymanndts darwider gedrungen oder beswerdt werden, auch von vnnsern wegen mit allem ernnst daran seiet damit sich die bemelten hunngrischen wellischen vnd oberlenndischen kauflewt nu hinfuro kainerlay furkauffs auf den dorffern vnd flegkhen obberurter vnnser Nider Osterreichischen lannde mit kastraun ochsen vnd anndern inmassen hieuor begriffen ist mer gebrauchen sonnder denselben genntzlichen abstellen vnnd hirynn alles des so vns an vnnserm camergut vnd obbenannten vnnsern stetten vnd merkhten zu aufnemen frumen vnd gutem kumbt hanndlet vnd furnemet. Daran tut ir vnnser ernnstlich maynung. Geben in vnnser vnd des heiligen reichs stat Awgspurg am vierden tag des monets aprilis anno funfftzehenhundert vnd im zehenden vnnserer reiche des romischen im funnfundtzwaintzigisten vnd des hungrischen im zwaintzigisten jaren.
Per regem
pro se.
Comissio domini
imperatoris propria

/Pečat izstavitelja na hrbtu listine ohranjen./

GZL IV/50

Po originalu B. Otorepec

Opomba:
Listina objavljena v Božo Otorepec, Dragan Matić, Izbrane listine Zgodovinskega arhiva Ljubljana (1320-1782), Transkripcije z regesti in komentarji, Ljubljana 1998, str. 85-88.